كلمات اغانى الحقيبة

[اميرة ابايزيد]

أنة المجروح

كلمات : سيد عبد العزيز
الحان : الحاج محمد أحمد سرور

يا أنة المجروح يا الروح حياتي تروح
الحب فيك يا جميل معني الجمال مشروح
للحب لهيب فى الجوف زيو الزناد مقدوح
منه الجبابرة تلين لصوت بلابل الدوح
تصاحبو النسمات تفضل معاها تدوح
من نغمة الأشواق ومحاسن الممدوح
الناس تحب رؤياك بالخاطر المشروح
يا ملفت الأنظار يابسمة المفروح
حوريه فى السودان بحبى ليكى أبوح
عنب جناين النيل أتمنى منه صبوح
وانشد فؤادى الضال بين الرياض مذبوح
أرى الهلال فى ظلال تلك الخميلة يلوح
أنا لو ضمنتو رضاك اكون سعيد ممنوح
يا من تسر رؤياك تفرح تنسى النوح
تكسو النهار بجمال خديك جمال ووضوح
منو الغزالة تقف فى موقف المفضوح
من الوله للقاك دمعى العزيز مسفوح
ناقم على الأيام مع أنه طبعى صفوح
انا والخيال فى جدال وانت بنداك منفوح

[اميرة ابايزيد]

زهـــــــــرة الروض

عمر البنا

زاد وجدى نوم عينى اصبح قليل
يا زهرة طيبك جانى ليل
اقلق راحتى وحار بى الدليل
امتى اراك مع الخليل

يا زهرة الروض الظليل
جانى طيبك مع النسيم العليل
واجلس امامكم خاضع ذليل

دايما انوح واقول حليل
صفى القلب القدره جليل
كيف لا اسهر واكون عليل
انا فى الثرى وهو فى الاكليل
يا الليك عفافك دايما زميل
يا المن طيبك طيب زهر الخميل
لو مر نسيمك على الف ميل
يخلى العالم طربا ثميل
يا اهيف يا ذا الطرف الكحيل
يا الصدرك عالى وخصرك نحيل
مناى فى الدنيا قبل الرحيل
ارى شخصك لكن مستحيل
يا زهرة روضك يبعد عن الـ
عاشق ومحال للقاك ينيل
بستانك نضير ساقيه نيل
الحياة ومحصن بالدردنيل
امتى تعود ايامى القبيل
يا حبيب واوجد للقاك سبيل
ومعاك اتحادث فى قبيل
شفاء داء قلبى الوبيل
قال لى صحيح جسمك هزيل
وجمر الغرام فى عضاك نزيل
لو ما بخاف عاذلى الرذيل
لكنت اوصلك ولعياك ازيل

[اميرة ابايزيد]

ولهان هامى دمعى
الشاعر عبيد عبد الرحمن

ولهان هامى دمعى ..وسهران ساهى بالى
بعدك لى ميسر..... وقربك ليه ابالى
بى ذكراك معذب......كل ما الليل مسالى
قلبي يزيد حنانو.....وقلبك ليه قالي
جرت وجار زماني ....وخاطرك طاب نسالى
مهما جد بينك.....صابر مانى سالي
*****
ابكي حبيبي بعدك ..... ايامى الخوالي
انشد فيك صفاهن...وانشد فيك موالى
لولا مسيل دموعي.....بلانى وروالى
حرقت جسمي نارك ...وحرق الكان حوالي
*****
صده سبب نحولي.....وبعده سبب ملالى
حبه ملك فؤادي.....وأتمازج خلالي
أما سبب شقاي ....ودائي واعتدالي
نور محيه الهلالي....ونور خده البلالى
*****
بعدت عنى دارك....ومنع الحظ رحالي
حبك زاد ىنحولى ...وشوقك زاد محالى
أنا ولهان وراضى.....ومرك عندي حالي
والليمنى فيك.....ياحالى يصيبه حالي
*****
لحظك دار كؤوسه...راح الروح سقالى
كنت سمير هناى....وكنت نشيد مقالي
قصدي أتم شرابي......لكن ما بقالي
عنب الشام بحبه..... إلا عصيره غالى

[اميرة ابايزيد]

اندب حظى
احمد حسين العمرابى

اندب حظي أم امالى.....دهري قصدني مالو ومالي

*******
شوف الخيره يارمالى....أظن كاتبني عن عمالي
عارض يعترض اعمالى.....أبنى وأملى ما تمالي
********
لا تقول ضعت من اهمالى ...أنا عامل الحزم رأس مالي
بس ايامى ما با سمالى..........همومي الزايدة متقاسمالى
********
بين الناس حميدة افعالى..........أصلى من الجناب العالي
حبك وحبي مانافعالى................يوم ينعوني لا تنعالى
********
قلبي المن الوساوس خالي............اليوم انشغل ياخالى
لو كان في اللحد ادخالى.............أحلى من العذاب ياخالى
********
دوام آيات محاسنك تالي...........زيد في هجري لا ترتالى
مقسم عن هواك ما تالي.......... طرفك بالهلاك أفتى لي
*******
حبك كاتمه زاد انحالى.......من فرطه الدموع فاضحالى
الشاقنى ومغير حالي.............حسنك واللهيج الحالي
*******
هاك شكواي لو تصغالى...............العدو حن لي رقالى
سهران والدموع راشقالى.........وحياة حبي ليك يا غالى

[اميرة ابايزيد]

من الاسكلة وحلا
الشاعر ود الرضى

من الاسكلا وحلّ......قام من البلد ولّى
دمعي للثياب بلّ
********
بى داهى العذاب حلّ....وبى تذكاره بتسلى
قلبي الذاب واختلّ.....وين بدر التمام هلّ
*******
صفر ودع الوابور......حاجزين قمره أتنين دور
الوابور مرّ بالمجرور....شال ظبيا سكونو خدور
*********
جبل أوليا حبيبي غشا.....وحصل في القطينة عشا
يا قلبي الطفش وفشا.......الما آليته......... ينكفشا
********
حل زى الصقر خوى......بالبدر الدويم ضوّى
عاد لا حوله لا قوّه......حبيبي الليله في الكوه
*******
صباح الخير على ام نفلين.......أهني البيها محتفلين
سيد الحسن رب اللين.......شرف كوستى والجبلين
********
هنيئا حان وقت زهاك.........الرنك احتفل ببهاك
وين الليله يا النشهاك......يا ليت كنت في جلهاك
********
يا كاكا الحبيب طلاك......بعده الزاد نفوسنا هلاك
يا ملوط حليل نزلاك........يازمن الفراق نسلاك
*********
بقدومك كدوك أصبح.......سوقو من الكساد ارباح
انا من نياحى صرت ابح........كأنى فى مبرك المذباح
**********
زاد من بعدك الانكال......قلبى البالهموم..... انكال
شاطري العاصمه يا ملكال.....توفيقيه صبرى انا كال
*********
شامبى أضحى بيك مسرور.....بعد المنقلا يا سرور
يا جوبا حي أنا المضرور....بعده النوم بقى لي ضرور
************
من دا الهم ما بنجى.........حبيبي الليله في تونجا
يا خالق الخلق تنجا.......تركاكا..... حلت العنجا
********
سلام متنامى ما غبّ.....ما مرّ النسيم صبّ
يرضى ال للعفاف ربى....ويخدم كامل الرتبا
*********
صب يا دمعي لا تكون جاف......وياقلبى البقيت رجاف
البدر الخفا....... الانجاف.....اليوم شرف...... الرجاف

[اميرة ابايزيد]

أيام صفانا
محمد بشير عتيق

أذكري ايام صفانا واذكري عهد القاء
والليالي الفي حبور
اذكري ايام صفانا والليالي الفيها متبادلين وفانا
جينا بي كل اقتراب
من حديث يشفي الجراح
بي مغازلة وانشراح
والقمر بي ضياهو آالق والنسيم يهدينا انفاس الزهور

كنا داخل روضة مافيش حد سوانا
غير ان القمري يهتف بي هوانا
من اهازيج فنه يسمعنا اسطوانة
اما ارواحنا الخفاف
رافلة في اثواب عفاف
زي عرائس يوم زفاف
والنجوم بي عيون تسارق في اشتياق
تنظرنا من خلف الستور

الرياض مبتهجة داخل اقحوانا
والزهور نديانة تستقبل اوانة
زاهية يانعة ورايعة في توب ارجوانا
والنهر لينا اقترب
والطيور تسجع طرب
عاملة موسيقة قرب
انحنا صار مجلسنا عامر في طرب
في قبطة في نشوة وحبور

يا امير الحسن يا سامي المكانة
من عواطفك حبي لو فاقد مكانة
اهدي لي تفاحة بس او برتكانة
فهي غير شك مرضية
بيها اقتبس الضياء
بل اذوق طعم الحياة
انت ملهمني الاغاني
وانت مصدر فني
احساسي وشعوري

[اميرة ابايزيد]

الامان الامان

الامان الامان من فتكات عيونك

ارحم مهجتى
**************

يشغل قلبى حبك على مر الزمان

سلطانه استقر
في جوره استمر
كيف القى الضمان
يا ما انت ظالم وانا طايع اوامرك لى شخصك
مسالم يا حبيبي الامان
واسمح لي كمان اقبل يديك
و من نور وجنتيك نور مقلتي
*********************
فيك صور المحاسن ظهرت لي عيان
موسيقة حديثك مع سحر البيان
واذا مال قوامك يا زين الحسان
روحي تسيل عواطف وقلبي يذوب حنان
انا كيف ما اخافك ومما طرفي شافك ما حبيت خلافك
حبك منيتي.فرضي وسنتي.ناري و جنتي
*******************
و من يوم نشأتي
تقديسك شعاري و حبك نشوتي
ياسامي العروض ياموحي العروض
من صور جناني.ارسل ليك اغاني من ارقى المعاني
عنوان خبرتي ابداع فكرتي
تخليد زكرتي

[اميرة ابايزيد]

غصن الرياض المايد

كلمات : علي المساح

يا غصن الرياض المايد
يا الناحلني هجرك وانت ناضر وزايد
جافيتني ليه انا ليك رايد
***
يا غصن الرياض المايد
ما اظن عن غرامك لو اموت ما أحايد
سهران ليلي طال والعين صحت ما هجايد
تعبان قصدي ليمك وأنت ناضر وزايد
***
في الجيل يا الجمالك سائد
عينيك ليك جنودك وأنت ليهن قائد
يا نافر جفيتني بنظرة لي ماك جايد
شوفتك زي هلال العيد وفيه أعايد
***
انا وحبك ترعرعنا ونشأنا ندايد
من زمنا قبيل أيام قلال وعدايد
ما خلص القديم وتبين مصايبه جدايد
حن يا حبيبي كفاي مر العذاب وشدايد
***
يا خلاصة الحواري المن جنان وخوالد
حسنك ليك يدوم لا أم تلد لا والد
رافل في ظلال مجد التليد التالد
يا لابس العفاف حلية وعقود وقلايد
***
عانيت في ليالي هواك صنوف وأحايد
مشكلة بين هواي وجفاك وأنت محايد
بس ما ذنبي غير صوت النشيد ونشايد
في مدحك بنيت قصر الرشيد الشايد

[اميرة ابايزيد]

يا ناعس الاجفان

كلمات : محمد بشير عتيق
لحن وغناء : كرومة

يا ناعس الاجفان أنا من صفاك مسحور

بالله انت ملاك والا من حسان الحور
***
تذرف عيوني بحور
أقضي الليالي قيام ما بين شوق وهيام
وارعي النجوم في سحور
وفؤادي آه منحور
مقتول بغير سلاح وأقول بكل صراح
سبب العيون الحور
***
فيك الكمال محصور
أكظمت كل حسود وحسنك مقامه يسود
علي كل جيل في عصور
طرفك لحاظه تريع أسدا شجاع وهصور
ليك نفرة الغزلان مع جبرة الفرسان
في هيبة المنصور
***
أهيف رشيق متبور
تتهادي تيه ودلال ما بيت غرف وظلال
نعمة وترف وحبور
وسهمك علي مهبور
أيه ذنبي غير هواك وانا يا جميل
بهواك من قلبي ما مجبور
***
يا البي العفاف مشهور
نيدك عبير فياح وقوامك المياح
أينع ثمار وزهور
بي حبي دمعي جهور
أنا في دجاك يا ليل نجمك بقالي خليل
فارقت نومي دهور
***
أنا من زمان مأسور
هجراني ما هماك يا ليلي قاسي لماك
من طول جفاك محسور
وحياة خديدك وجيدك وطريفك المكسور
أنا شعري ما بيوفيك مهما أبالغ فيك منظومي والمنثور .

[اميرة ابايزيد]

بت ملوك النيل

كلمات الشاعر / سيد عبد العزيز

يا بت ملوك النيل يا أخت البدور
مين لى علاك ينيل فى البدور والحضور

الجبرة فيك بتخيل محمية الحما

الما حام حداه دخيل

ما أبوكى بخيل بت عز الرجال

أهل الدروع والخيل

والهنا... والسرور

يا السامية ست الجيل طرفك من حياء

فى عصر السفور خجيل

حسنك وضع تسجيل فى صحف الدهور

يتلوه جيل عن جيل

لى يوم النشور

الهيفا يا الخنتيل حروف آيات محاسنك

أرتلن ترتيل

يعجبنى فيك تمثيل أخلاق الملاك

فى سطوة القتيل

الفارس الجسور

غضنك رطيب وعديل شعرك ليل

جبينك يخجل القنديل

النور عليكى سديل يا معنى الجمال

الما أتوجد له عديل

فى ناس ولا حور

فقتى الكانوا قبيل ما خدات فى الجمال

جائزة نوبيل

حيرتى كل نبيل عيناك سحرهن

يسحر سحر أبابيل

يخترق الصدور

يا صاحبة الأكليل ما أظن النهار

العين تدور له دليل

محياك نوره جليل كنت أقول شمس

لو ما الزمان كان ليل

أن عليك نور

لا زلت ليك أميل يا رمز السعادة

الما أتوجد له زميل

يا آية التكميل يا مراية الجمال

الفيكى كل جميل

ريحانة العصور